|
|
|
EqikkaaneqUna nalunaarusiaq Kalaallit Nunaata avannaatungaani pinngortitami avatangiisinullu pissutsit pillugit aallarniutaasumik misissuineruvoq. Misissuineq atuakkiarineqarsimasut kisiisa tunngavigalugit suliarineqarsimavoq. Nalunaarusiaq Naalagaaffiit Peqatigiit Imavinni pisinnaatitaaffiit pillugit isumaqatigiissutaanni § 76 naapertorlugu Kalaallit Nunaata avannamut killeqarfiata allineqarnissaanik piumasaqaammut atatillugu aallarniutaasumik misissuinissamut ilaatinneqassaaq.
Imartaq pineqartoq Kalaallit Nunaata avannaatungaaniippoq ilaatinneqarlunilu Avannaarsuup sineriaa kangimut Nordøstrundingip kimmullu Nyeboe Landip tiqeqquata akornaniittoq. Tamanna Issittumi avannarlermi misissorneqarluarsimannginnerpaanut ilavoq, Kalaallit Nunaatalu avannaata imartaani pinngortitamut avatangiisinullu tunngasut ilisimasaqarfigineqarpianngitsutut oqaatigisariaqarput.
Uumaatsunut tunngasut
Kalaallit Nunaata avannaatungaani Sikuiuitsup Avannarliup Imarpissuata itissusaanik, immap naqqata sananeqaataanik immallu allanik pissusaanik ilisimasaqarneq annikitsuararsuuvoq. Tamatumunga pissutaasut pingaarnerit ilagaat sikorsuaqarnerujussua pissutigalugu ulloq manna tikillugu umiarsuarnik imaani ilisimatusarnermut atorneqartartunik tikinneqarsinnaasimannginnera. Immap naqqata pissusaanik paasissutissatuat tassaapput immap naqqata qaarsoqarfianut atatillugu paasissutissat timmisartoq atorlugu katersorneqarsimasut, kiisalu sinerissap qaarsoqarfiata assingi kangiatungaanilu immap ikkattup naqqata assingi marluk. Avannaarsuup nunavittaata toqqavianut atatillugu allaat immap itissusaata tunngaviusumik assiliorneqarnerani paasissutissat amigartorujussuupput.
Uumasunut tunngasut
Piffiup soqutigineqartup imartaani sikuiuitsortaanilu timmissat uumasullu miluumasut ikittuararsuugunarput. Imarnersanut sikuneq ajortunut sikunerlu ajortunut allanut atatillugu sinerissap qanittuani uumasoqarsinnaanera ilimagisariaqarpoq. Soorlu imarnersaqarfik NØ-Vandet Peary Landillu akornanniittoq uumasunut miluumasunut timmissanullu pingaaruteqartorujussuusinnaavoq. Nuna aamma naggorissortaqarpoq, tamakkulu umimmaqarsinnaapput nerlernillu manniliortunik isasunillu najorneqarsinnaallutik.
Malussarissuseq, innarliisarnerit aqutsinerlu
Nunap naggorinnersai, piffiillu umimmannit piaqqiortunit amerlasuunit nerlernillu isasunit manniliortunillu najorneqartut inuit angalanerannut malussarissinnaasarput. Imaani imarnersat sikuneq ajortut allallumi ammaannartut timmiarpassuarnit uumasunillu miluumasunit
najorneqartut aamma inuit angalanerannut malussarissinnaasarput.
Avatangiisinut sunniutaasunik nalilersuineq
Nunavissuup toqqaviata killinganik misissuinerit avatangiisinut sunniuteqangaarsinnaanerat ilimagineqanngilaq.
Avatangiisinut sunniutaasinnaasut siunissamilu misissuinissat
Siunissami misissuinissat akerlianik annertunerujussuusinnaapput avatangiisinillu annertuumik innarliisinnaallutik, soorlu uuliamik maqittoornerit.
Silaannaap allanngortarnera
Avannaarsuata tamatumalu avannaatungaani imartap silaannaata allanngornissaanik missingersuusiat tunngavigalugit ataatsimut isigalugu ilimagineqarpoq silaannaap kiannerulernissaa, taamaalillunilu sikorsuaqartarnerata sivisussusaa siammasissusaalu annikillinissaa ilimagineqarluni. Sikorsuakinnerulernera imaani uumasoqarnerulerneranik kinguneqartussaavoq. Tamanna qularnanngilluinnartumik timmiaqassusaanut uumasunillu miluumasoqassusaanut annertuumik allannguuteqartussaavoq, nunallu naggorissusaanut aamma sunniuteqartussaalluni.
Paasissutissanik pisariaqartitsineq
Paasissutissat suulluunniit uumasoqarneranut tunngassuteqartut piffimmit pisariaqartinneqarput. Aatsitassiortoqalernerani, soorlu uumasoqarneranik naasoqarneranillu tunngaviusunik paasissutissanik sukumiisumik misissuisoqartariaqarpoq katersuisoqarlunilu.
Avatangiisinik aqutsinermi aalajangersakkat atuuttut
Piffimmi sammineqartumi avatangiisinik aqutsinermi aalajangersakkat atuutsinneqartut sakkukitsutut oqaatigisariaqarput, sakkortusineqartariaqarlutillu, taamaalilluni siunissami tamaani inunnit atuinissaq, ingammik imaani uuliasiorneq takornariaqarnerlu pakkersimaarniarlugu.
|
