|
|
|
Eqikkaaneq Kujataani Arsuup Kangerluani (Ilorput) Ivittuuni 1854-mit 1987-mut
aatsitassaq orsugiak piiarneqarsimavoq, immikkoortiterneqarluni avalaassorneqarlunilu. Aatsitassarssiornerup kinguneranik kangerluk aqerlumik zinkimillu mingutsinneqarsimavoq. Mingutsitsinermut pissutaasut pingaarnersaraat orsugiak narrugisaq Ivittuuni sinerissamut
immiutaasimasoq. Narrugisat tamakku aqerlussamik zinkissamillu akoqarput taakkulu tinittarneramit ulittarneramillu arrortinneqarlutik Arsuup Kangerluanut siaruatiterneqarlutik.
Tamaani mingutsitsineq 1982-mili nakkutigineqalerpoq. Nakkutilliinermi tassani 1985-mili qeqqussat uillullu kisimik sammineqarsimapput, tassa siornatigut misissuisarsimanerit takutissimammassuk
kangerlummi aalisakkat kinguppaallu aqerlumik zinkimillu mingutsinneqarsimanngitsut.
Nalunaarusiami matumani misissuineq kingulleq, junimi 2001-mi ingerlanneqarsimasoq, nassuiarneqarpoq.
Sumiiffiup sammineqartup iluani qeqqussat uillullu aqerlumik zinkimillu akoqarnerisa 2001-mi ersersippaat Ivittuuni talittarfeqarfik suli mingutsitsinermik aallaaviusut pingaarnersarigaat, allaat Taylers Havnip eqqaani, Ivittuunit 6 km missiliorlugu kujasinnerusumiittoq,
sumiiffik annikitsoq ingammik aqerlumik annertunerusumik akoqartoq
siumorneqarsimagaluartoq.
Arsuup Kangerluata silataatungaa tamakkerlugu sinerissami uillut aqerlumik annertunerusumik akoqarput qeqqussallu zinkimik qaffasissumik akoqarlutik, sinerissamilu isorartuallaanngitsumi Ivittuunit kangimut kujammut 3 km-rit missiliorlugit ungasitsigisumit Ivittuunillu
avannamut kimmut 9 km-rit ungasitsigisumut qeqqussat aqerlumik annertunerusumik akoqarput.
Ivittuut eqqaani sinerissami 10 km-rit pallillugit isorartutigisumi uillut angisuut aqerlumik akoqassusiat ima annertutigaaq, uillunik katersuinissaq nerinissarlu inerteqqutigineqarluni. Tamaani pissutsit 1992-mit allanngorsimanngillat, sinerialli mingutsinneqartoq siornatigut
isorartunerusimagaluarpoq.
Qeqqussat uillullu aqerloqassusiat 1998-mit 2001-mut ukiut misissuiffigineqartut
ingerlaneranni (1982-2001) appariarsimavoq. Piffissami 1998-mit 2001-mut zinkeqassuseq allanngorarsimavoq, ukiullu misissuiffigineqartut ingerlaneranni (1982-2001) Arsuup Kangerluani
zinkimik mingutsitsinerup allanngornera erseqqissumik takuneqarsinnaanngilaq.
|
